Om oss - Kontakt og opningstider

Gamlestova barnehage har desse satsingane i 2025/2026:
Fysisk og psykisk helsefremjande barnehage; 
I Gamlestova skal barna vere fysisk aktive kvar dag. Ute- og innetid skal vektleggast like mykje, og vi skal ha like god vaksentettleik inne som ute. Vi skal vere ein psykisk helsefremjande barnehage der leiken er i fokus. Vi har fokus på FN’s barnekonvensjon og barn sine rettar, barn sitt fysiske leikemiljø, relasjonar vaksen-barn og foreldresamarbeid. 4 åringane (f. 2020)– går gjennom leikeprogrammet «Kule krabatar leikar». 

Livsmeistring - robuste barn og ungdom 2020-2025
Samarbeidsprosjekt Luster og Sogndal. Gi barn kompetanse, dugleik og verktøy til å kunne utvikle ei god og robust psykisk helse. Barna skal lære seg å takle livets med- og motgangar. Personalet har fått presentasjon av metoden «Hjertesamling». Det er ein metode for å førebyggje vald og overgrep. Gjennom opplegget får barn språk og verktøy til å kunne fortelje om det som er vanskeleg. Prosjektet har eiga nettside: meistrelivet.no

Foreldresamarbeid 
Vi har fokus på foreldresamarbeid der vi jobbar med ulike sider ved dette. Det er spesielt fokus på oppstartssamtale for å bygge gode relasjonar med føresette og sikre trygg overgang for barnet frå heim til barnehage.  

Vaksenrolla
For oss er tryggleik og trivsel viktige faktorar. Vi vil at de som foreldre skal reise frå barnehagen og vera trygge på at barna har det godt. For å oppfylle dette, må vi ta oss god tid saman med barna, vere engasjerte, nærverande og positive. Det handlar om den AKTIVE VAKSNE.

Vi arbeider etter prinsipp frå: Circle of security (COS), tryggleikssirkelen; som gir oss verktøy til å forstå barnet betre. Dette er og eit tilbod som foreldrekurs. 
«Se barnet innenfra» er eit tilknytningsbasert program for personalet som skal auke vår  bevisstheit på kva barn treng for å fremje tryggleik, livsmeistring og helse.

Sosial kompetanse /Leikekompetanse 
Leik er frivillig og styrt av barnet sjølv, og den er grunnleggande for barn si læring og utvikling. Vi vil skape eit godt leikemiljø fysisk og psykisk. Barna skal ha medverknad på kva og kven dei vil leike med i kvardagen. Målet er at alle barn skal vera inkluderte og oppleve at andre barn vil leike saman med dei, og at alle skal vera ein god og grei leikekamerat. Leik er barna sin viktigaste aktivitet og er ein svært sentral del av dagen i Gamlestova barnehage. Vi i barnehagen vektlegg : vennskap, empati, konsentrasjon, toleranse, humor, konfliktløysing, dele opplevingar, godheit, rettferdigheit, verdi for gruppa, inkludering, rollemodell, tru på seg sjølv, språktrening,  sjølvstendigheit, sosialisering.

Omsorg, danning, leik og læring
Omsorg i barnehagen handlar om relasjonar og tryggleik. I Gamlestova barnehage skal nærleik, vilje til å lytte, og innleving prege samspelet mellom barn og vaksen. Personalet skal gje barna rom for å være seg sjølv, og hjelpe barna til å fylgje reglar, normer og sosiale krav.

Foreldreråd, foreldrerådets arbeidsutval (FAU) og samarbeidsutval (SU) 

I tillegg til dagleg kontakt, foreldresamtalar og foreldremøte er det lovpålagte samarbeidsorgan som skal sikra at foreldre har reell påverknad på det som skjer i barnehagen. 

Foreldrerådet består av alle foreldra i barnehagen. Her kan dei møtest, diskutera ønske og behov og koma med forslag til barnehagen. Dette vert gjerne halde som del av foreldremøte tidleg på hausten. Det er foreldrerådet som vel representantar til FAU og til SU. 

FAU skal vere bindeleddet mellom foreldra og barnehagen i saker som gjeld fleire enn kun eige barn. FAU skal fremja foreldregruppa sine fellesinteresser overfor barnehagen og arbeide for eit godt barnehagemiljø.

Samarbeidsutvalet (SU) er eit lovpålagt utval med likt tal tilsette og foreldre. SU er eit rådgjevande, kontaktskapande og samordnande organ. Representantane i SU har teieplikt. SU tek opp saker som er meldt inn frå foreldrerådet, personalet eller styrar. Det er SU som godkjenner barnehagen sin årsplan, jf. barnehagelova § 2. Aktuelle saker i SU kan vera: faglege satsingar, budsjett og økonomi, rutinar, trafikktryggleik, personalsituasjon, foreldreundersøkingar. 

Medlemmer av Samarbeidsutvalet 2025/26:

• Leiar ; Ida Høyheim Vik
• Nest-leiar ; Marit Haugan Hove
• Representant frå Utdanningsforbundet ; Kathrine Vikøren Myhre
• Representant frå Fagforbundet ; Cathrine Nese
• Politikar ; Einar Bolstad
• Vara – politikar : Vivian Kvam
• Sekretær ; Per Rune Joranger
   

Medlemer av Foreldrerådets arbeidsutval 2025/26:

• Leiar ; Ida Høyheim Vik
• Nest-leiar ; Marit Haugan Hove
• Kasserar ; Veronika Kalhagen
• Sekretær ; Maria Opheim
• Fest-ansvarleg ; Tine Kvalheim
• Styremedlem ; Silje Marie Foss
• Styremedlem ; Nina Dyregrov

Arbeidsoppgåvene for FAU dette barnehageåret vert i hovudsak å arrangere aktivitetar i barnehagen, samt den praktiske gjennomføringa av jule- og sommarfesten.

Barnehagen ynskjer eit tett samarbeid med føresette som er tufta på likeverd og respekt for kvarandre. Det er viktig at ein kommuniserer godt begge vegar. Dersom det skulle oppstå vanskar, vil tidleg og felles innsats som regel løyse problemet.

Barnehagen skal leggja til rette for foreldresamarbeidet og god dialog med foreldra mellom anna i form av jamleg utveksling av observasjonar og vurderingar knytt til det enkelte barnet si helse, trivsel, erfaringar, utvikling og læring. Barnehagen skal grunngje sine vurderingar overfor foreldra og ta omsyn til foreldra sine synspunkt.  

Føresettportalen - Visma Flyt Barnehage  
Luster kommune brukar Visma Flyt Barnehage som barnehageadministrativt system. Tilsette og føresette kan logga seg inn den tilhøyrande app’en Foresattportalen og enkelt senda meldingar mellom heim og barnehage. Føresette loggar inn med ID-porten. 

Foreldremøte
Foreldremøte er ein viktig arena på fleire måtar: Barnehagen har høve til å informera direkte til foreldregruppa og foreldra kan verta kjende med kvarandre. På foreldremøtet kan ein også utveksla erfaringar frå barnehagekvardagen, og foreldra kan koma med sine synspunkt på aktuelle saker. Samarbeid og dialog er nøkkelord for det gode foreldremøtet. 

Den vanlege måten å organisera foreldremøte ved Gamlestova barnehage er at foreldra vert delt i grupper, det vert lagt fram eit tema eller ei problemstilling som gruppa diskuterer. 

Foreldresamtalar
Alle foreldre har behov for informasjon om utviklinga til barnet deira og å få vita at barnet har det godt den tida det er i barnehagen. Barnehagen tilbyd difor foreldra to samtalar i løpet av barnehageåret, ein gong om hausten og ein gong om våren. Faste tema er trivsel, samhandling med andre barn og utviklinga til barnet.