Erling Bjørnetun har vore ein nøkkelperson og ei drivkraft i kulturlivet i Luster i over 45 år. Innsatsen for kulturlivet har dels vore gjennom jobben sin som kultursjef og seniorrådgjevar i Luster kommune. Han har altså arbeidt med kultursektoren i Luster kommune sidan august 1980. Men også gjennom ei rekke verv og oppgåver for frivillige lag og organisasjonar har han gjort ein solid kulturinnsats like lenge. Rollene har vore mange og varierte: sekretær og leiar, guide og formidlar, skribent og redaktør, deltakar og arrangør.
Bjørnetun har vore initiativtakar og prosjektleiar for eit utal større og mindre kultur- og idrettsprosjekt, både i arbeidet for Luster kommune og på fritida. Nærmiljø, lokalhistorie, kulturarv, dokumentasjon og aktivitet er sentrale stikkord for virket.
Bjørnetun har ivra sterkt for lokalhistorisk formidling og dokumentert dette både i form av artiklar, bøker, radioprogram og video. Det seinaste produktet er den imponerande filmserien «Kulturen i naturen» som ligg fritt tilgjengeleg på YouTube. Storverket som redaktør er nok det over 40-år-lange arbeidet med bygdebøkene. Første bandet om Fortun kom i 1984. Snart føreligg siste band i bygde- og ættesoga i Luster kommune for sal, bind 12 om Kroken, Ornes og Kinsedal. Bjørnetun og hans medarbeidarar i bygdebokprosjektet har stått for eit formidabelt bokverk som er unikt i norsk lokalhistorie.
Bjørnetun har hatt ei særskild interesse for kulturminne og kulturforvaltning, her kan til dømes nemnast Munthehuset, Wittgensteinhuset, Ornes stavkyrkje og gamle Gaupne kyrkje. Når det gjeld lokal kulturhistorie, slektsforsking og ikkje minst temaet utvandringa til Amerika, så har Bjørnetun bidrege med ekspertise og entusiasme for å spreie kunnskap om fagfeltet både her i Luster, regionalt og internasjonalt i det norske Amerika.
Luster er ein kommune med mange grender. Nesten alle stader er det ballbingar, nærmiljøanlegg eller idrettsanlegg. Mykje har kome i stand gjennom spelemiddelordninga og samarbeid mellom frivillige lag og organisasjonar og kommunen. På dette området har Bjørnetun vore sentral i ei årrekke gjennom idear, rådgjeving og praktisk hjelp til aktuelle søkjarar. Seinast i haust var det markering av nytt lysanlegg på Hafslo stadion. Då retta leiar av Hafslo IL ein særskild takk til Erling Bjørnetun for god hjelp og støtte fram mot realisering av anlegget.
Erling sitt virke på kulturfeltet har vore mangesidig, omfattande og langvarig. For den formidable og unike innsatsen for kulturlivet i Luster er det ei glede og ære å tildele kulturprisen i 2025 til Erling Bjørnetun.
Erling Bjørnetun får Kulturprisen 2025
Ørjan Talle
Her kan du sjå kven som har fått prisen sidan 1985