Utdelinga av prisen ”Årets bedrift i Luster” er ei årleg tilskiping på Lustramarknaden. I år er det 36. gongen denne utmerkinga vert delt ut.
Det er næringsutvalet i Luster kommune som avgjer kven som får prisen.
I statuttane for tildelinga står det mellom anna:
«Prisen som årets bedrift er ei honnørutmerking. Prisen vert delt ut til ei bedrift som på ein
positiv måte har utmerka seg. Prisen kan gå til etablerte føretak og nyetableringar»
I år 2026 går prisen til ei bedrift som, skal me kalle det, er i sin beste alder. Bedrifta
vart etablert i sin noverande form i 1999, så i ein alder av 27 år må me seie at den er i
godt driv. Mange Lustringar har fått god hjelp når det lyser ei lampe i dashbordet, eller det
er ein litt rar lyd når ein svingar eller rett og slett treng ein vanleg service på bilen.
Prisen «Årets bedrift» går i år til Gaupne Bilsenter AS. Eg vil be eigarane komme fram.
I 1999 overtok Einar Bringe verkstaden og bedrifta Gaupne Bilsenter her i Gaupne. Han
hadde då drive Luster Mekaniske Verkstad inne i Luster nokre år etter tidlegare eigar Einar
Bondevik. Allereie fyrste året hadde bedrifta 4 tilsette.
Arbeidsmengda og kundegrunnlaget auka jamt og trutt kvart år. I 2012 vart verksemda slege i
saman med med Øiene Bilverkstad, og Espen Bolstad kom også inn på eigarsida. Gaupne
Bilsenter er i dag eigd av Einar Bringe, Petter Skare, Kolbjørn Haganes og Espen Bolstad, alle med lik eigardel. Dagleg leiar har i alle år fram til 2025 vore Einar, men no har Petter teke over den rolla. Gaupne Bilsenter er i dag godkjent Bosch Car Service og er ein frittståande verkstad som kan utføre arbeid på alle bilmerkjer, også bubilar og el-bilar. Dei er og godkjent lærebedrift og har jamnleg lærlingar i arbeid.
Kundane kjem frå heile indre Sogn, sjølvsagt mest frå nærområde, men det er kundar frå
Aurland, Årdal, Høyanger, Balestrand, Leikanger og Sogndal. Noko som vitnar om nøgde kundar og godt utført arbeid. No har Gaupne Bilsenter 9 tilsette og har ein årsomsetnad på heile 25 millionar kroner, i
2025 hadde dei eit driftsresultat på 2,3 millionar. Einar, Peter, Kolbjørn og Espen har med godt
arbeid og langsiktig kvalitet over mage årbygd ei solid bedrift me kan vere stolte av.
Til lukke med prisen som Årets Bedrift 2026