Bispevisitas på rådhuset. Framme frå venstre: Prost Kjell Olav Høstaker Nordheim, konsulent folkehelse Helga Garborg Sie, fellesrådsleiar Janne Sønnesyn, biskop Ragnhild Jepsen og ordførar Andreas Wollnick Wiese. Bak frå venstre: kommunedirektør Jon Bolstad, rådgjevar Tore Skjæveland, kommunalsjef Knut Åge Teigen, kommunalsjef John Olaf Røhme og kyrkjeverje Morten RørstadbottenEin viktig del av ein visitas er møte med kommuneleiinga.
Tysdag føremiddag hadde biskopen og følgje møte med ordførar, kommunedirektør, kommunalsjefar og representant for folkehelse. Frå kyrkja i Luster stilte kyrkjeverje Morten Rørstadbotten og fellesrådsleiar Janne Sønnesyn.
På dagsorden stod ein kort presentasjon frå administrasjonen om Luster kommune i tal og bilete, ei orientering om førebyggande arbeid i kommunen, oppvekstvilkår for barn og unge og tilhøva for utsette grupper. Det vart særleg lagt vekt på arbeidet med barn og unge, fritidstilbod i feriane og ungdomsklubb. Samtalen var også innom tema som samarbeidet mellom kommune og kyrkje, kyrkjebygningane i Luster og forvaltning av gravplassar.
«Sist gong det var bispevisitas var i 2010, så det er både høgtideleg og stor stas at biskopen kjem til kommunen», seier ordførar Andreas Wiese. «Kyrkja og kyrkjelydsarbeidet er ein viktig del av Lustrasamfunna både i kvardag, høgtid, glede og sorg. Det var flott å få til dette møtet og gjevande å ha dialog med biskopen om livet og samfunnstilhøva i kommunen.»
Dagen i Gaupne vart avrunda med spørjetime saman med 10. klasse på Luster ungdomsskule og møte med personalet etterpå. Elevane stilt godt førebudde og hadde til saman laga 71 spørsmål om alt frå kva som skal til for å verte biskop til kva som er meininga med livet.
Birk og Simon innleia spørjetimen med å fortelje om korleis det er å vere ungdom i Luster.