På heimesida til Stiftinga Miljøfyrtårn er det skildra at ei Miljøfyrtårn-sertifisert verksemd har dokumentert at den oppfyller omfattande og relevante krav innan miljø og berekraft, tilpassa bransje, aktivitet og drift. Kriteria dekkjer mellom anna område som arbeidsmiljø, avfall, energi, innkjøp og transport. Verksemda er forplikta til å arbeide kontinuerleg med å forbetre sine miljøprestasjonar. Gjennom årleg rapportering og resertifisering kvart tredje år sikrar Miljøfyrtårn at arbeidet er oppdatert og i samsvar med gjeldande kriterium og samfunnsforventningar. Verksemder som viser til strukturert og dokumentert berekraftarbeid, vert oppfatta som meir seriøse og får auka tillit i marknaden.
I samband med utdelinga av det synlege og fysiske beviset på sertifiseringa kom ordførar Andreas Wiese, stabsleiar Ole Gunnar Krakhellen og fagansvarleg nærings- og samfunnsutvikling Ivar Kvalen på bedriftsbesøk hjå begge bedrifter. På GT Bil møtte kommunen Kjell Øystein Ruud og Fredrik Erfjord som gav eit innblikk i det å drive og utvikle verkstad og tilhøyrande aktivitetar, og hjå Josvanger Elektro sto Johannes Josvanger, Frank Neset, Anders Josvanger og Tonje Johnsen klar til å orientere om historikk og framtidsutsikter. Både GT Bil og Josvanger Elektro er solide verksemder som er lokalisert på næringsområdet Galdetoppen på Hafslo. GT Bil vart etablert på Galdetoppen i 2008 og Josvanger Elektro vart etablert i 1991, og har hatt base både på Indre Hafslo, Sogndal og frå 2015 på næringsområdet på Hafslo. Begge verksemdene har lærlingar og framhevar dette som eit viktig samfunnsoppdrag. Gjennom å ha blitt miljøfyrtårnsertifisert seier verksemdene at mykje var på plass allereie, og at dei i stor grad har fått stadfesta ein god praksis. Å ha sertifiseringa på plass vil vere viktig for å vere kvalifisert for oppdrag frå både det offentlege og ein del private kundar. Frå bedriftsbesøka elles fekk kommunen gode innspel med seg, mellom anna ei oppfordring om å legge til rette for kompetanseutvikling og nettverk lokalt i Luster og Sogn.
- Luster kommune set pris på solide og framoverlente verksemder som ønskjer å drive godt. Det som er god praksis for miljøet er ofte også god økonomistyring, og eg ser det er nyttig å gå systematisk gjennom sin eigen aktivitet. Eg gratulerer GT Bil og Josvanger Elektro så mykje med gjennomført miljøfyrtårnsertifisering, og ønskjer dei lukke til med vidare drift og utvikling av verksemder og arbeidsplassar. Eg vil samstundes nytte høvet til å oppmode andre verksemder i Luster om å sjå på moglegheitene for å følgje i deira gode døme og bli miljøfyrtårnsertifisert, seier ordførar Andreas Wiese.
Her kan du lesa meir om miljøfyrtårnsertifisering
Det tek litt tid og ressursar for ei bedrift å bli sertifisert, og difor har Luster kommune etablert eit tilskot på kr 20 000 til alle verksemder som vert sertifisert som miljøfyrtårn eller ei av dei andre anerkjende ordningane.
Frank Neset, Anders Josvanger, Tonje Johnsen og Johannes Josvanger (Josvanger Elektro), ordførar Andreas Wollnick Wiese og Kjell Øystein Ruud og Fredrik Erfjord frå GT Bil AS